Cynhaliwyd rownd derfynol Brwydr y Bandiau Menter Iaith Cymru a BBC Radio Cymru 2011 ar C2 BBC Radio Cymru ar Mai 4ydd, a chyhoeddwyd mai’r enillydd yw Siân Miriam o Ysgol Gyfun Llangefni, Sir Fôn. Bydd y disgybl 17 oed o Langristiolus nawr yn cael cyfleon i berfformio mewn amrywiol ddigwyddiadau cerddorol, recordio sesiwn i C2 BBC Radio Cymru a sylw yn y wasg fel rhan o’r wobr.

Wedi misoedd o gystadlu brwd ledled Cymru, daeth pedwar i’r rownd derfynol neithiwr, a phedwar gwahanol iawn o ran steil cerddoriaeth. Yn brwydro am y teitl yn erbyn Siân Miriam roedd Y Saethau o Ysgol Syr Hugh Owen, Caernarfon; Downhill, Ysgol Gyfun Maes yr Yrfa, Cefneithin a Swnami, Coleg Meirion Dwyfor, Dolgellau. Enw cân fuddugol Sian Miriam yw Beth yw ystyr rhyfel?

Magi Dodd oedd yn cyflwyno rhaglen ar C2 BBC Radio Cymru gyda Rhodri Llwyd Morgan, cerddor a chanwr Cerrig Melys, y DJ Ian Cottrell, a Meilyr Gwynedd, canwr gyda’r band Sibrydion yn rhoi eu barn. Ond gan y gwrandawyr roedd y bleidlais i ddewis pwy fyddai’n ennill.

“Mae safon y bandiau sydd wedi cyrraedd rownd derfynol y gystadleuaeth eleni yn arbennig o uchel, ac fe allai unrhyw un o'r pedwar fod yn enillwyr teilwng,” meddai cyflwynwraig C2 Magi Dodd cyn y rhaglen.

“Beth sy’n braf yw fod pob un yn cynnig rhywbeth gwahanol i’r gystadleuaeth, ac mae rhywbeth at ddant pawb yno. Mae wir yn bleser dilyn datblygiad y bandiau yma dros gyfnod y gystadleuaeth – o’u gweld yn fyw, i’w danfon i stiwdios recordio proffesiynol ac yna gael gweld y band buddugol yn manteisio’n llawn o’r wobr ar lwyfan Maes B neu recordio’u sesiwn i C2.”

Cafodd y bandiau gyfle i recordio eu cân ar gyfer y rownd derfynol mewn stiwdio broffesiynol, ac wedi eu darlledu ar raglen C2, agorodd y llinellau ffôn i wrandawyr gael bwrw’u pleidleisiau.

Wedi i’r llinellau gau a’r pleidleisiau gael eu cyfri, cyhoeddwyd mai Siân Miriam oedd yr enillydd eleni, ac roedd y sgrechfeydd ben arall y ffôn yn arwydd clir bod Siân wrth ei bodd o glywed y newydd.

Ar raglen Dafydd a Caryl bore heddiw (Dydd Iau, Mai 5), yn ei chyfweliad cyntaf ers clywed ei bod wedi ennill y noson gynt, dywedodd Siân Miriam pa mor hapus oedd o dderbyn o wobr, a bod Caryl Parry Jones yn un o’r rhai a’i hysbrydolodd i ddechrau cyfansoddi a pherfformio, yn ddim ond 9 oed.

Disgrifiodd glywed ei bod wedi ennill fel “noson orau ‘mywyd i” gan ychwanegu am berfformio ym Maes B Eisteddfod eleni fel rhan o’r wobr, “ellai’m dweud pa mor gyffrous ydi hynna!”

Mae’r wobr gyfan yn cynnwys:

cytundeb i recordio Sesiwn i C2 BBC Radio Cymru
perfformio ym Maes B, Eisteddfod Genedlaethol eleni
erthygl tudalen lawn yn un o rifynnau'r cylchgrawn 'Y Selar'
sesiwn lluniau hanner diwrnod efo ffotograffydd proffesiynol
gwahoddiad i berfformio yng ngŵyl Huw Stephens, Gŵyl Sŵn 2011
perfformio ar lwyfan Pentref Ieuenctid yn y Sioe Frenhinol eleni
cynnig i chwarae mewn gigs Mentrau Iaith Cymru
cyfle i berfformio ar Daith Ysgolion C2 2011

Am fwy am y gystadleuaeth ac i glywed y rownd derfynol ewch i bbc.co.uk/radiocymru

Mae Mentrau Iaith cymru a C2 Radio Cymru yn trefnu Brwydr y Bandiau

Y Rownd Gyn-Derfynol
Beirniaid: Bethan Elfyn, Rhodri Llwyd Morgan, Hefin Jones

Nos Fawrth, Mawrth 24ain
Llongyfarchiadau i Smashing Diamonds am gyrraedd y rownd derfynol!

- Smashing Diamonds
- Plant Bach Annifyr
- Steffan Huw
- Y Cnobau

Nos Fercher, Mawrth 25ain
Llongyfarchiadau i Nevarro am gyrraedd y rownd derfynol!

- Nevarro
- Yr Angen
- Corn Bîff
- Osian Hedd

Nos Iau, Mawrth 26ain
- Crwydro
- Bettis Muff
- Cymdeithas yr Hobos Unig
- Ji-Bincs

Llongyfarchiadau i'r Offbeats o Grymych ar ennill Brwydr y Bandiau Mentrau Iaith Cymru / C2 Radio Cymru 2008, gan guro Stone Free (o Aberystwyth) a Tempo (hefyd o Grymych) yn y rownd derfynol ar Orffennaf 2ail.

Mae'r wobr i'r band ifanc yn un sylweddol - byddant yn recordio Sesiwn i C2; yn cael ymddangos ar raglenni teledu Bandit ac Uned 5 ar S4C; perfformio yn Maes B, Eisteddfod Caerdydd 2008; chwarae mewn gigs Mentrau Iaith Cymru; yn ogystal a pherfformio ar Daith Bandit / C2 2008.

Rownd Gyn-Derfynol ByB
21 Mai 2008
Pwy? Pryd? Lle? Manylion y rownd nesaf i gyd!

Mae 'r rowndiau rhanbarthol drosodd.
Amser felly i edrych ymlaen tuag at rowndiau cyn derfynol Brwydr y Bandiau Mentrau Iaith Cymru a C2 Radio Cymru 2008.

Mi fydd y rowndiau yn digwydd dros 3 noson ar C2 sef Nos Fawrth, Mercher a Iau 3 - 5 Mehefin rhwng 8 a 10 o'r gloch ar raglen Magi Dodd.

Er mwyn penderfynu pa fandiau fydd yn cystadlu pa noson, mi wnaeth Dafydd o'r band Coda ddod i stiwdios moethus C2 at Magi i dynnu enwau'r bandiau o het.

A dyma'r canlyniad:
Nos Fawrth 3 Mehefin
Ocsimoronig
Heretica
Tempo
Nos Fercher 4 Mehefin
Liam Rickard
Caswallon ap Cranc
Stone Free
Nos Iau 5 Mehefin
T.S.S
Road Kill
Yr Offbeats

Ai chi fydd Y Sibrydion, Yr Ods neu'r Elin Fflur nesaf?

Rydan ni yn chwilio am gerddorion 16 - 21 oed i gystadlu ym Bwydr y Bandiau Mentrau Iaith Cymru/C2!

Mae'r wobr i'r enillwyr yn cynnwys:
* cytundeb i recordio Sesiwn i C2, Radio Cymru
* perfformio mewn Gwyl fawr genedlaethol megis Maes B, yr Eisteddfod Genedlaethol
* cael erthygl 'tudalen-lawn' yn un o rifynnau o gylchgrawn 'Y Selar'
* sesiwn luniau (photoshoot) hanner diwrnod efo ffotograffydd proffesiynol
* gwahoddiad i berfformio yng Ngwyl Swn (Huw Stephens) 2011
* perfformio ar lwyfan y Pentre Ieuenctid yn y Sioe Frenhinol
* cynnig i chwarae mewn gigs Mentrau Iaith Cymru
* cyfle i berfformio ar Daith Ysgolion C2 2011

Gellir darllen y rheolau llawn yma:
http://www.bbc.co.uk/radiocymru/c2/safl e/brwydrybandiau/2011.shtml

Am wybodaeth pellach neu sut i gystadlu, e-bostiwch c2@bbc.co.uk

Mae C2 BBC Radio Cymru a Mentrau Iaith Cymru yn trefnu Brwydr y Bandiau 2009

Y Rowndiau Rhanbarthol

Rhanbarth y De-Orllewin
Nos Iau, Chwefror 12fed - Neuadd San Pedr, Caerfyrddin
Yn fuddugol: Ji-bincs, Nevaro, Smashings Diamonds


Rhanbarth y De-Ddwyrain
Nos Wener, Chwefror 20fed - Theatr Coleg Merthyr Tudfil
Yn fuddugol: Osian Hedd, Steffan Huw, Yr Angen


Rhanbarth y Gogledd
Nos Fawrth, Mawrth 10fed - Caban Cysgu, Gerlan, Bethesda
Yn fuddugol: Crwydro

Rhanbarth y Canolbarth
Nos Fercher, Mawrth 11eg - Tafarn y Cwps, Aberystwyth
Yn fuddugol: Cymdeithas yr Hobos Unig, Plant Bach Annifyr, Y Cnobau

Mae rownd derfynol ByB08 ar nos Fercher Gorffennaf 2il gyda bandiau Tempo, Stone Free ac Yr Offbeats. Cofiwch wrando ar C2 Radio Cymru.

Pwy fydd y Radio Luxembourg, Frizbee, Euros Childs neu’r Genod Droog nesa’? Dyma beth mae Mentrau Iaith Cymru ac C2 BBC Radio Cymru am ei ddarganfod wrth iddyn nhw lansio cystadleuaeth Brwydr y Bandiau 2008, un o’r cystadlaethau mwyaf yng Nghymru i ddod o hyd i’r band mawr nesaf.

Bydd y band buddugol yn cael y cyfle i recordio sesiwn i raglen C2, i chwarae mewn gigs Mentrau Iaith Cymru, perfformio ym Maes B, Eisteddfod Genedlaethol Caerdydd 2008 ac ar daith C2 Bandit heb sôn am ymddangos ar raglen deledu Bandit ac Uned 5 ar S4C.

Mae croeso i fandiau ac artistiaid o unrhyw fath gystadlu - roc, hip-hop, jazz, blues, pop, gwerin neu ddawns. Does dim ots faint o aelodau sydd yn y band ac mae croeso i artistiaid unigol a deuawdau.

Rhaid i hanner aelodau’r band fod yn 21 mlwydd oed neu yn iau, bod y band neu artist heb ryddhau CD sydd ar werth mewn siopau (heblaw am ymddangos ar CD amlgyfrannog), a’u bod yn medru perfformio tair cân yn y Gymraeg. Mae mor syml â hynny!

I gael mwy o wybodaeth ac i gofrestru ar gyfer y gystadleuaeth, cysylltwch â’ch Menter Iaith leol cyn gynted a phosib – mae manylion cyswllt ar wefan www.mentrau-iaith.com.